Cənubda, xüsusilə də Lənkəran, Masallı, Astara və Lerikdə çərşənbənin sonuncusu, Torpaq çərşənbəsi xüsusi təntənə ilə qeyd edilir. Lənkəranlılar İlaxır Çərşənbənin səhəri su üstünə gedib niyyətlərini suya deyirlər.
Cenublu.az xəbər verir ki, Lənkəranda İlaxır Çərşənbəyə hazırlıqlar günlər öncədən başlayır. Axşam saatlarında ocaqlar qalanır, gənclər və uşaqlar bu ocaqların üzərindən tullanırlar… Çərşənbənin səhəri isə lənkəranlılar çay kənarına gedirlər. Bu mərasim əsasən Lənkərançayın Sütəmurdov kəndi ərazisindən keçən hissəsində qeyd olunur. Sakinlər çaydan su götürüb əl-üzlərini yuyur, bardaqlara doldurduqları suyu apararaq evin dörd bir küncünə səpirlər. Bu da ilin bərəkətli və uğurlu keçəcəyinə inamla bağlıdır.
Maraqlı ənənələrdən biri isə gənc xanımların saçlarını kəsib axar çaya atmasıdır. Onlar inanırlar ki, bu ayin saçlarının çay kimi gur və uzun olmasına kömək edəcək. Bundan başqa, köhnə əşyalar və geyimlər də çaya atılır ki, yeni il bolluq və firavanlıq gətirsin.
Səhər saatlarından başlayan bu maraqlı mərasim günortaya qədər davam edir. İlaxır Çərşənbənin qeyd olunması xalqımızın qədim inanclarına sadiqliyini və Novruzun mənəvi dəyərlərini yaşatmaq ənənəsini bir daha göstərir.
