Azərbaycanda meyvə bağları və giləmeyvə əkinlərinin dövlət dəstəkli sığortalanması prosesi davam edir. Artıq ölkə üzrə çiyələk əkinlərinin aqrar sığortasına başlanılıb.
Kənd Təsərrüfatı Nazirliyindən azertag.az-a verilən məlumata görə, ölkəmizdə çiyələk plantasiyalarının sahəsi ildən-ilə artır. Belə ki, 2023-cü ildə 313 hektar, 2024-cü ildə isə 221 hektar yeni çiyələk bağı salınıb. Hazırda Azərbaycanda 4256 hektar sahədə çiyələk və digər giləmeyvə növləri əkilib. Bu əkinlərin 4 min hektarı artıq bara düşüb.
Çiyələk ən çox Cəlilabad (600 hektar), Lənkəran (360 hektar), Masallı (300 hektar), Şəmkir (300 hektar) rayonları ərazisində əkilir.
Çiyələk plantasiyalarında illik orta məhsuldarlıq 10 ton/hektara yaxın təşkil edir.
Cəlilabad rayonu üzrə ötən il rekord səviyyədə - 32 ton/hektar orta məhsuldarlıq qeydə alınıb.
Fermerlər əkinlərini sərfəli şərtlərlə, cüzi ödəniş etməklə sığortalaya bilirlər. Sığorta haqqının 50 faizi dövlət tərəfindən ödənilir. Ümumilikdə isə 1000 manatlıq çiyələk məhsulunun sığortalanması fermerlərə Lənkəran-Astara regionunda 14,7 manata, Mərkəzi Aran regionunda 14,2 manata, Qazax-Tovuz regionunda 30,7 manata, Quba-Xaçmaz regionunda isə 16 manata başa gəlir.
