Bu gün vətən uğrunda canlarından keçən şəhidlərimiz – Sadiq Ağabalayev, Mirzə Axundov və Namiq Nəcəfovun doğum günüdür.
Sadiq Nadir oğlu Ağabalayev 1998-ci il martın 15-də Cəlilabad rayonunun Privolnoye kəndində anadan olub.Sadiq Ağabalayev 2016-cı ildə Azərbaycan Silahlı Qüvvələrinin sıralarında müddətli həqiqi hərbi xidmət qulluqçusu olub. Hərbi xidmət müddətində 2016-cı ilin aprelin 2-dən 5-nə qədər davam edən Aprel döyüşlərində yaxından vuruşmuş, fərqlənmişdir.
O, Vətən müharibəsi zamanı Cəbrayılın və Qubadlının azadlığı uğrunda gedən döyüşlərdə vuruşub, 2020-ci il oktyabrın 22-də Qubadlı rayonu istiqamətində döyüş tapşırığının yerinə yetirilməsi zamanı şəhid olub.
Ölümündən sonra "Vətən uğrunda", "Cəsur döyüşçü", "Cəbrayılın azad olunmasına görə", "Qubadlının azad olunmasına görə" medalları ilə təltif edilib.
Mirzə Musa oğlu Axundov 1984-cü il martın 15-də Lənkəran rayonunun Gəgiran kəndində anadan olub.
O, Vətən müharibəsi zamanı Suqovuşanın və Talışın azadlığı uğrunda gedən döyüşlərdə savaşıb. Mirzə Axundov oktyabrın 2-də Talış istiqamətində şəhid olub. Xəzər rayonunun Türkan qəsəbəsində dəfn olunub.
Ölümündən sonra "Vətən uğrunda", "Suqovuşanın azad olunmasına görə", "Laçının azad olunmasına görə" medalları ilə təltif edilib.
Namiq Nəcəf oğlu Həmidov 1994-cü ildə Masallı rayonunun Lürən kəndində anadan olub. 3 aprel 2013-cü ildə hərbi xidmətə yollanıb. 2013-cü il mayın 27-də Ağdərə rayonu ilə üzbəüz Həsənqaya mövqeyində baş vermiş şiddətli döyüş zamanı düşmənin iki hərbi texnikasını sıradan çıxarıb və müşahidə postunu dağıdıb. Kəşfiyyat postuna qayıdan zaman Namiq arxadan düşmənin snayper gülləsinə tuş gələrək şəhidlik zirvəsinə ucalıb.
O, 28 may 2013-cü ildə Masallı rayonunun Lürən kəndində torpağa tapşırılıb.
