Cəlilabadda şəkər çuğunduru təsərrüfatına maraq artıb. Bu haqda məlumatı Cenublu.az bu gün, 5 avqust tarixində Azertac-a istinadən verir.
Belə ki, fermerlər ötən il ümumilikdə 4 hektar ərazidə əkdikləri məhsulu bu il 150 hektara qədər genişləndiriblər. Yeni texnologiyaların tətbiqi ilə, hətta suvarılmayan torpaqlarda belə bol məhsul yetişdirilib.
Bölgədə İmişli Şəkər Zavodunun fəaliyyəti Cəlilabadda da bu sahənin inkişafına zəmin yaradıb. 80 hektara yaxın sahədə şəkər çuğunduru əkən Ocaqlı kənd sakini sahibkar Füzuli Ağayevin sözlərinə görə, vaxtında edilən düzgün aqrotexniki qulluqla hər hektardan 60-70 tondan artıq məhsul götürmək mümkündür. Satış qiyməti məhsulun hər tonunda şəkərlilik faizinə görə tənzimlənir.
Mütəxəssis İmran Babayev rayonda şəkər çuğunduruna marağın artmasının səbəblərindən biri kimi yüksək gəlirliliyi qeyd edib.
Qeyd edək ki, Cəlilabad DAİM-dən aldığımız məlumata görə, bu il rayonda 150 hektar sahədə şəkər çuğunduru bitkisi əkilib. Hazırda vegetasiya dövründə olan bitkinin sentyabr ayından yığımına başlanılacaq. Məhsulun sahədən müasir texnikalar vasitəsilə yığılması və daşınmasında da heç bir problem yaşanmır. Müqavilə şərtlərinə əsasən, bütün bu işlər İmişli Şəkər Zavodu tərəfindən həyata keçirilir.
