Cəlilabad rayonunun Fərəcullalı kəndində 2023-cü ilin sentyabrında baş tutan lokal antiterror tədbirləri zamanı şəhid olan Məhərrəm Hüseynovun adı verilən bulağın açılışı olub.
"Report"un Muğan bürosunun məlumatına görə, mərasimdə şəhidin doğmaları, rəsmi şəxslər, qazilər və ictimaiyyət nümayəndələri iştirak ediblər.
Tədbirdə çıxış edənlər şəhidin keçdiyi qəhrəmanlıq yolundan geniş söhbət açıblar.
Daha sonra bulağın açılışı baş tutub.
Qeyd edək ki, Məhərrəm Ələşrəf oğlu Hüseynov 1983-cü ildə Cəlilabad rayonunun Fərəcullalı kəndində anadan olub. O, orta təhsilini Fərəcullalı kənd orta məktəbində alıb. M.Hüseynov 44 günlük Vətən Müharibəsinin iştirakçısı olub, “Vətən müharibəsi iştirakçısı”, “Xocavəndin azad olunmasına görə” medalları ilə təltif edilib.
O, Azərbaycan Ordusu tərəfindən 2023-cü il sentyabrın 19-20-də həyata keçirilmiş uğurlu lokal antiterror tədbirləri zamanı Xocavənd rayonunun Harov kəndi istiqamətində gedən döyüşlərdə şəhid olub.
Məhərrəm Hüseynov 3-cü dərəcəli “Vətənə xidmətə görə” ordeni və "Vətən uğrunda” medalı ilə (ölümündən sonra) təltif edilib.
