Cəlilabad Rayon İcra Hakimiyyətində Məhərrəm ayı ərzində dini mərasimlərin təşkili ilə bağlı iclas keçirilib. Bu haqda məlumatı Cenublu.az bu gün, 5 iyul tarixində verir.
Cəlilabad Rayon İcra Hakimiyyətində keçirilən iclasda Məhərrəm, Aşura və digər dini mərasimlərin keçirilməsi ilə əlaqədar Cəlilabad Rayon İcra Hakimiyyətinin başçısı Rafiq Cəlilov, RİH tərəfindən yaradılmış Qərargah üzvləri, Dini Qurumlarla İş üzrə Dövlət Komitəsinin Masallı bölgəsi üzrə şöbəsinin baş məsləhətçisi Cavidan Rəşidov, rayon İcra Hakimiyyəti başçısının inzibati ərazi dairələri üzrə icra nümayəndələri, bələdiyyə sədrləri və dindarlar iştirak ediblər.
İclasda Rafiq Cəlilov çıxış edərək dövlət-din münasibətlərinin yüksək səviyyəsinin təməlini qoyan Heydər Əliyevin milli-mənəvi dəyərlərə hər zaman diqqət və qayğısını, onun başlatdığı ali mənəviyyat yolunun bu gün İlham Əliyev tərəfindən ən yüksək səviyyədə davam və inkişaf etdirilməsini qürurla vurğulayıb. Həmçinin Məhərrəm ayı ilə bağlı tədbirlərin mövcud qanunvericilik çərçivəsində keçirilməsinin zəruriliyini diqqətə çatdırıb.
Cəlilabad şəhər “Cümə” məscidinin imam müavini Mikayıl Mirzəyev, Dini Qurumlarla İş üzrə Dövlət Komitəsinin Masallı bölgəsi üzrə şöbəsinin baş məsləhətçisi Cavidan Rəşidov çıxış edərək məhərrəmlik mərasimlərində hər kəsə tələblərə ciddi riayət etməyi tövsiyə edərək, zəncir vurub baş yarmağın, bədənə əziyyət verməyin dində bəyənilmədiyini və bunun əvəzinə qanvermə aksiyalarında fəal iştirak etməyin daha humanist hərəkət olduğunu bildiriblər.
