Aqrar sığorta Cəlilabad filialı fermerlərlə görüşləri davam etdirir. Bu haqda bu gün, 22 fevral tarixində Cenublu.az ASF-yə istinadən xəbər verir.
Tədbirin keçirilməsində əsas məqsəd fermerlərin dövlət dəstəkli aqrar sığorta xidmətləri, sığorta qaydaları, aqrar sığortanın əhəmiyyəti haqqında məlumatlandırılmasıdır. Cəlilabad filialının rəhbəri Rafət Əskərov və əməkdaşları rayonun Göytəpə ərazisində fəaliyyət göstərən iri çiyələk əkin sahələrini özündə birləşdirən Rut Fruit MMC-də əkinçilərlə görüşüblər. Görüşdə aqrar sığorta mexanizminin işləyişi, əkin sahələrinin hansı tipli risk və təbii fəlakətlərdən sığorta olunması, zərərlərin qiymətləndirilməsi və ödənişlərin həyata keçirilməsi qaydaları barədə məlumat veriblər. Bundan başqa, Cəlilabad rayonu ərazisində yerləşən “Gilan Holding”ə məxsus üzüm bağlarında, Təzəkənd, Günəşli, Ocaqlı kəndləri ərazisində yerləşən “French Vinyard” MMC-yə məxsus üzüm bağlarında fermerlərlə görüşlər keçirilib. Təbliğat xarakterli görüşlər Alar, Təzəkənd, Üçtəpə, Günəşli, Ocaqlı kəndlərindəki fərdi sahibkarlarla da baş tutub.
Sığorta fondunun Cəlilabad filialı ölkənin kənd təsərrüfatının böyük hissəsini əhatə edən Lənkəran–Astara iqtisadi rayonunda fermerlərə xidmət göstərir. Bu iqtisadi rayona Cəlilabad, Astara, Lerik, Lənkəran, Masallı, Yardımlı inzibati rayonları daxildir. Kənd təsərrüfatında faraş tərəvəzçilik, kartofçuluq, üzümçülük, taxılçılıq üstünlük təşkil edir. İqtisadi rayon mühüm sitrus meyvəçiliyi rayonudur.
