Bu gün, 16 iyul tarixində Xalq artisti İlham Əsgərovun anadan olmasının 66-cı ili tamam olur.
İlham Təvəkkül oğlu Əsgərov 1958-ci ildə Masallıda anadan olub. O, Azərbaycan Dövlət Mədəniyyət və İncəsənət Universitetinin Dram və kino aktyorluğu fakültəsində təhsil alıb. 1982-ci ildən Akademik Milli Dram Teatrında çalışıb. Teatrda, televiziya tamaşalarında, filmlərdə (“Doğma sahillər”, “Biz qayıdacağıq”) maraqlı rollar oynayıb. Filmlərin səsləndirilməsində iştirak edib.
İlham Əsgərov Azərbaycan dövlət radiosunun məşhur "Bulaq" verilişinin aparıcılarından biri olub. İlham Əsgərov Azərbaycan Respublikasının Əməkdar artisti, Xalq artisti fəxri adlarına layiq görülüb. Prezident mükafatçısı olub. 2010-cu ildə Cəfər Cabbarlı mükafatını qazanıb.
Xalq artisti 2015-ci ildə beyninə qan sızmasından dünyasını dəyişib.
