Bu gün, 19 iyul tarixində Azərbaycan Silahlı Qüvvələrinin əsgəri, Vətən müharibəsi şəhidi Cəbrayıl Qasımovun mövlud günüdür.
Cəbrayıl Baloğlan oğlu Qasımov 1996-cı ildə Masallı rayonunun Ərəb kəndində anadan olub. 2002-ci ildə Rafiq Əlihəsənov adına Masallı şəhər 1 nömrəli tam orta məktəbinin birinci sinfinə daxil olub. 2013-cü ildə həmin məktəbi bitirib.
Orta təhsilini başa vurduqdan sonra - 2014-cü ilin iyul ayında çağırışçı kimi hərbi xidmətə yollanıb. Əsgərliyini Azərbaycan Silahlı Qüvvələrinin Tərtər rayonunda, “N” saylı hərbi hissədə rabitəçi kimi keçirib. 2016-cı ilin yanvar ayında ordu sıralarından tərxis olunub.
Vətən müharibəsi zamanı Füzuli və Cəbrayıl rayonlarının işğaldan azad olunması uğrunda gedən döyüşlərdə düşmənə qarşı böyük mərdliklə döyüşərək, şəhidlik zirvəsinə ucalıb. Şəhidin nəşi 9 oktyabr 2020-ci il tarixində doğulduğu Ərəb kənd qəbiristanlığında izdihamla torpağa tapşırılıb. Nişanlı idi.
Ölümündən sonra “Vətən uğrunda” medalı ilə təltif olunub.
