Bu gün Azərbaycan Silahlı Qüvvələrinin giziri, Vətən müharibəsi şəhidi İskəndər Dövlətlinin dünyaya gəldiyi gündür.
İskəndər Vüqar oğlu Dövlətli 1992-ci ildə sentyabrın 24-ü Lerik rayonunun Soru kəndində anadan olub.
2020-ci ildə başlayan Vətən müharibəsi zamanı döyüşdən döyüşə erməni işğalçılarına sarsıdıcı zərbələr endirərək onların xeyli sayda canlı qüvvəsini məhv edib. Oktyabrın 9-u Xocavənd rayonunun Hadrut qəsəbəsi ərazisində gedən döyüşlərdə qəhrəmancasına döyüşərək şəhidlik zirvəsinə ucalıb.
İ.Dövlətli ölümündən sonra "Vətən Uğrunda", "Xocavəndin azad olunmasına görə", "Cəbrayılın azad olunmasına görə" və "Füzulinin azad olunmasına görə" medalları ilə təltif olunub.
İskəndər Dövlətli şəhid olduğu gündən 33 gün sonra atası Vüqar Dövlətli vəfat edib.
Qeyd edək ki, şəhidin əmisi Aqşin Dövlətli 1992-ci ildə Birinci Qarabağ müharibəsində döyüşüb və şəhid olub.
