Bu gün, 24 avqust tarixində Lənkərandan olan Vətən müharibəsi şəhidi Aqşin Nazim oğlu İbadovun mövlud günüdür.
Azərbaycan Ordusunun Xüsusi Təyinatlı Qüvvələrinin mayoru olan Aqşin İbadov 1984-cü ildə Boladı kəndində anadan olub. O, 2001-2005-ci illərdə Heydər Əliyev adına Azərbaycan Ali Hərbi Məktəbinin "kəşfiyyatçı" ixtisasında təhsil alıb. 2005-ci ildə "leytenant" rütbəsi alaraq hərbi vəzifəyə başlayıb.
A.İbadov 2020-ci ildə başlanan Vətən müharibəsi zamanı Murovdağın, Füzulinin, Cəbrayılın, Xocavəndin və Zəngilanın azadlığı uğrunda gedən döyüşlərdə iştirak edib. Oktyabrın 19-da Xocavənd rayonunun Tuğ kəndi istiqamətində döyüş tapşırığını yerinə yetirərkən qəhrəmancasına şəhid olub.
Ölümündən sonra "Vətən uğrunda", "Cəbrayılın azad olunmasına görə", "Kəlbəcərin azad olunmasına görə", "Xocavəndin azad olunmasına görə", "Füzulinin azad olunmasına görə" medalları və "Rəşadət" ordeni ilə təltif edilib.
