Bu gün Masallı rayonundan olan şəhid Əlimərdan Fəttah oğlu Quluzadənin anım günüdür.
Cenublu.az xəbər verir ki, Əlimərdan Quluzadə 1993-cü il fevralın 14-də Birinci Yeddioymaq kəndində dünyaya gəlib.
Həyatını hərb sənətinə bağlayan gənc 2018-2011-ci illərdə Cəmşid Naxçıvanski adına hərbi liseydə və 2011-2015-ci illərdə Heydər Əliyev adına Azərbaycan Ali Hərbi Məktəbində təhsil alaraq leytenant rütbəsi almışdı.
2015-2020-ci illərdə baş leytenant kimi Bakı şəhərinin Müşfiq qəsəbəsində yerləşən N saylı hərbi hissədə Vətənə xidmət borcunu şərəflə yerinə yetirən Əlimərdan Quluzadə 2016-cı ildə baş verən uğurlu Aprel döyüşlərinin iştirakçısı olub.
Orduda nümunəvi zabit kimi xidməti göstərdiyinə görə 2013-cü ildə "Azərbaycan Respublikası Silahlı Qüvvələrinin 95 illiyi (1918-2013)" və 2018-ci ildə "Azərbaycan Ordusunun 100 illiyi (1918-2018)" yubiley medalları ilə təltif edilib.
2020-ci il sentyabrın 27-də Vətən müharibəsi zamanı Füzulinin azadlığı uğrunda döyüşlərdə qəhrəmanlıq göstərən baş leytenant Əlimərdan Quluzadə oktyabrın 6-da Füzulidə döyüşlər zamanı torpaqlarımızın ərazi bütövlüyü uğrunda qəhrəmancasına şəhid olub.
O, ölümündən sonra “Vətən uğrunda” və “Cəbrayılın azad olunmasına görə” medalları ilə təltif edilib.
