Bu gün Masallıdan olan I Qarabağ müharibəsi şəhidi Səfəralı Məmmədovun dünyaya gəldiyi gündür.
Cenublu.az “Ocaq” qəzetinə istinadən xəbər verir ki, 1963-cü ildə Masallı rayonunun Sərçuvar kəndində anadan olan Səfəralı Məmmədov 1981-ci ildə burada məktəbi bitirir və hərbi xidmətə çağırılır. O, 1983-cü ildə ordudan tərxis edilir. Krasnodar şəhərinə gələrək milis sisteminə daxil olur. 1990-cı ildə Bakı Xüsusi Orta Milis Məktəbinə göndərilir. Buranı leytenant rütbəsi ilə bitirən Səfəralı Qarabağa getmək istədiyini bildirir, ona Bakıda hava limanında iş təklif edilsə də, o, inadından dönmür .
Səfəralı Məmmədov Ağdam rayonunda polis komandiri kimi döyüşlərə atılır. Sarışın olması, rus dilini səlis bilməsi ona ermənilər arasına təkbaşına getməsinə imkan verirdi. Səfəralı Fərruxda, Ağbulaq fermasında, Qarakənd kəndində onlarla ermənini əsir götürmüşdü. 1992-ci il fevralın 16-da onun son döyüşü oldu. Səfəralının idarə etdiyi maşın qumbaraatanla vurularkən qəlpələrdən bir neçəsi kəmərindəki əl qumbarasına dəyib və o, şəhidlik zirvəsinə yüksəldi. Onun nəşi Masallı rayonunun Sərçuvar kəndində dəfn edilib.
Azərbaycan Respublikası prezidentinin 6 iyun 1992-ci il tarixli 831 saylı fərmanı ilə Məmmədov Səfəralı Qurban oğluna ölümündən sonra Azərbaycanın Milli Qəhrəmanı adı verilib.
