Bu gün, 5 iyul tarixində Lənkəran Dövlət Dram Teatrının mərhum aktyoru Niftulla Əsgərovun doğum günüdür.
Niftulla Əsgərov 1959-cu ildə Lənkəran rayonunun Girdəni kəndində anadan olub. Aktyorluq fəaliyyətinə 1995-ci ildən etibarən başlayan Niftulla Əsgərov teatr fəaliyyəti müddətində S. M. Qənizadənin "Xor-xor" əsərində Seyfulla, İ. Məlikzadənin "Gəl qohum olaq"ında Camal, H. Abbaszadənin "Həzi Aslanov"unda Bekişvilli, Ü. Hacıbəyovun "Olanlardan-keçənlərdən" əsərində Atamoğlan əmi, N. B. Vəzirovun "Hacı Qənbər" əsərində Qıdı Kirvə, E. İsgəndərzadənin "Qalxın, məhkəmə gəlir"ində Bəhruz, H. Mirələmovun "Vicdanın hökmü"ndə Aşot, B. Nuşiçin "Nazirin xanımı"nda Çeda, N. Nərimanovun "Nadir şah"ında Əliəşrəf bəy və s. obrazlara səhnə həyatı verib.
Bununla yanaşı, paralel olaraq "My name is İntiqam", "My name is İntiqam 2", "Bayram axşamı", "Bığ əhvalatı", "Vəziyyət rusca", "Elçilik" və başqa filmlərdə, "Bizim Əhməd haradadır?", "Xalxın evi" və s. seriallarında bir çox obrazlar canlandırıb.
O, 22 yanvar 2024-cü ildə uzun sürən xəstəlikdən sonra dünyasını dəyişib, Lənkəran rayonunun Girdəni kənd qəbiristanlığında dəfn olunub.
