Bu gün, 9 iyul tarixində dram aktyoru Eynəli Nurullayevin anım günüdür.
Eynəli Nurullayev 20 sentyabr 1947-ci il tarixində Lənkəran rayonunun Darquba kəndində anadan olub. O,1969-cu ildə M.A.Əliyev adına Azərbaycan Dövlət İncəsənət İnstitutunun Dram və kino aktyorluğu fakültəsini bitirib. 1969-cu ildən 1973-cü ilədək H.Ərəblinski adına Lənkəran rayon Xalq Teatrının rejissoru vəzifəsində çalışıb, 1973-cü ildən etibarən isə N.B.Vəzirov adına Lənkəran Dövlət Dram Teatrında aktyor vəzifəsində fəaliyyət göstərib.
E.Nurullayev 100-dən çox bədii əsərlər əsasında hazırlanmış tamaşalardakı obrazları canlandıraraq onlara səhnə həyatı verib.
O, eyni zamanda rejissor kimi də bir sıra əsərə səhnə quruluşu verib.
E.Nurullayev ictimai və yaradıcılıq fəaliyyətinə görə 1979-ci ildə "Azərbaycan Respublikası Ali Sovetinin Fəxri fərmanı" ilə, 2013-cü ildə isə Mədəniyyət və Turizm Nazirliyinin “Fəxri mədəniyyət işçisi” döş nişanı ilə təltif olunub, bir sıra nüfuzlu festivallarda diplomlara layiq görülüb.
Eynəli Nurullayev 9 iyul 2014-cü ildə 67 yaşında vəfat edib.
