Bu gün Vətən müharibəsi şəhidi Ramiq Ağayevin anım günüdür.
Ramiq Ağayev 12 fevral 1992-ci ildə Astara rayonunun Səncərədi kəndində anadan olub. E. Ağayev adına Səncərədi kənd tam orta məktəbində təhsil alıb. 2009-cu ildə həmin məktəbin məzunu olub. Tankçı olmaq uşaqlıq arzusu olub və sonda öz istəyinə çatıb.
2010-cu ildə həqiqi hərbi xidmətə çağırılıb. Müdafiə Nazirliyinin “Gizir hazırlığı hərbi kursu”nu bitirib. Sonra sürücü-mexanik kimi 2012-ci ildən Azərbaycan Silahlı Qüvvələrinin sırasında hərbçi ömrünü yaşamağa başlayıb. Ramiq 2016-cı il Aprel döyüşlərində igidlik göstərib.
Azərbaycan Ordusunun əsgəri olan Ramiq Ağayev 27 sentyabr 2020-ci ildə Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan İkinci Qarabağ müharibəsində iştirak edib. O, ermənilərin çox sayda istehkam qurğularını və canlı qüvvəsini məhv edib. Cəbrayıl uğrunda gedən qızğın döyüşlərdə ağır yaralanıb, 13 gün sonra, oktyabrın 19-da şəhid olub.
MAHHXHQ əsgər Ağayev Ramiq Təhsin oğlu ölümündən sonra “Vətən uğrunda” və “Cəbrayılın azad olunmasına görə” medalları ilə təltif olunub.
