Bu gün Vətən müharibəsi şəhidi Pərvin Təbriz oğlu Salmanzadənin doğum günüdür.
Pərvin Salmanzadə 1991-ci ildə sentyabrın 17-si Astara rayonunun Pensər kəndində anadan olub. O, 1997-2008-ci illərdə Mirzə Fətəli Axundzadə adına Pensər kənd 1 saylı tam orta məktəbində təhsil alıb. 2009-cu ildə hərbi xidmətə yola düşüb. Hərbi xidməti başa vurduqdan sonra o, bir müddət “Azpetrol LTD” MMC-də inspektor vəzifəsində çalışıb. Daha sonra Pərvin orduda MAXE hərbi qulluqçu kimi xidmət etməyə başlayıb.
Vətən müharibəsi zamanı o, Ağdərə və Xocavənd istiqamətlərində gedən döyüşlərdə qəhrəmanlıq və igidlik göstərərək, düşmənin xeyli sayda canlı qüvvəsini məhv edib. 2020-ci ildə noyabrın 6-sı Şuşa şəhərinin azadlığı uğrunda gedən şiddətli döyüşlərdə komandiri və əsgər yoldaşlarını xilas edərkən şəhidlik zirvəsinə ucalıb.
Şəhidin nəşi Seyid Camaləddin türbəsində torpağa tapşırılıb.
Ölümündən sonra “Vətən uğrunda”, “Cəsur döyüşçü”, “Cəbrayılın azad olunmasına görə”, “Füzulinin azad olunmasına görə”, “Xocavəndin azad olunmasına görə” , “Şuşanın azad olunmasına görə” və “Döyüşdə fərqlənməyə görə” medalları ilə təltif olunub.
