Biləsuvar rayonunda saxtalaşdırılan 270 ədəd alkoqollu içki aşkar olunub.
Cenublu.az-a bu barədə Qida Təhlükəsizliyi Agentliyindən (AQTA) məlumat verilib.
Bildirilib ki, Biləsuvar şəhəri, Heydər Əliyev prospektində yerləşən topdan satış obyektində plandankənar yoxlama vətəndaş müraciəti əsasında, aidiyyəti bölməsi tərəfindən aparılıb.
“Sözügedən ünvanda yoxlama zamanı Samir Nizami oğlu Nağıyevə məxsus obyektin anbar hissəsində saxlanılan və ümumilikdə 270 ədəd saxtalaşdırma əlaməti daşıyan alkoqollu içki müəyyən edilib.
Nəticədə normalara uyğun istehsal edilmiş içkilərin eyni marka adı ilə saxtalaşdırıldığı məlum olub. Aşkar edilən pozuntularla bağlı obyektin məsul şəxsi barəsində İnzibati Xətalar Məcəlləsinə uyğun olaraq protokol tərtib edilib. Həmin məhsullar saxlanca götürülüb, nümunələr isə analiz üçün aidiyyəti laboratoriyaya göndərilib. Analiz nəticələrindən asılı olaraq qanunvericiliyə uyğun tədbirlərin görülməsi davam etdiriləcək. Qida Təhlükəsizliyi Agentliyi qida sahəsində fəaliyyət göstərən sahibkarlıq subyektlərini qidatəhlükəsizliyi tələblərinə ciddi riayət etməyə çağırır və istehlakçıların sağlamlığının qorunması istiqamətində nəzarət tədbirlərini davam etdirəcəkdir”, - məlumatda deyilir.
