Biləsuvarda kişi qeyri-rəsmi arvadını sosial şəbəkə üstündə döyüb.
Cenublu.az-ın əldə etdiyi məlumata görə, hadisənin istintaqı Biləsuvar Rayon Məhkəməsində keçirilib.
Belə ki, təqsirləndirilən Novruz Nəcəfov (ad şərtidir) qeyri-rəsmi münasibətdə olduğu zərərçəkmiş Sevinc Cəfərovanı (ad şərtidir) döyüb. Buna səbəb Sevinc Cəfərovanın ondan icazəsiz “TikTok” hesabı açması və orada videolarını paylaşması olub.
Novruz Sevincin “TikTok” açdığını gördükdə bunu icazəsiz etməsinin səbəbini soruşub. Lakin mübahisə böyüməyib. Bir müddət sonra Sevinc Novruzun başqa qadınlarla danışmasına irad bildirib. Hər şey üst-üstə gəldiyi üçün kişi əsəbiləşərək qadının üstünə hücum çəkib. Sevinc çaydandakı qaynar suyu Novruzun üstünə töküb. Novruz da qızı dayanmadan 10 dəqiqə döyüb.
Bununla da Novruz Nəcəfov Azərbaycan Respublikası CM-nin 128-ci (sağlamlığa zərər vurma) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Novruz Nəcəfov ona qarşı irəli sürülən ittiham üzrə özünü təqsirli bilib. O, ifadəsində göstərib:
“8 ildir ki, Sevinclə qeyri-rəsmi nikahda olmaqla birgə yaşayırıq. Bir gün “TikTok”da videolara baxarkən təsadüfən onun da qeydiyyatdan keçməsini və videolar paylaşmasını gördüm. Niyə icazəsiz etdiyini soruşdum, amma əsəbimi sıxıb dalaşmadım. Bir neçə müddət sonra məni başqa qadınlarla danışmaqda günahlandırdı. Hamısı üst-üstə gəldi və onu vurmağa başladım. Əməlimdən peşmanam”.
Daha sonra məhkəmədə zərərçəkmiş Sevinc Cəfərova ifadə verib:
“Novruzla münasibətdə olduğum müddətdə mütəmadi olaraq mübahisələr etmişik. Hadisə günü o, evə daxil olub “TikTok” işlətdiyimi, qeyri-əxlaqi həyat tərzi sürdüyümü deyib, qohumlarım barəsində söyüşlər söydü. Düzgün danışmağını tələb etdikdə isə üzərimə cumdu”.
Məhkəmənin qərarı ilə Novruz Nəcəfova 6 ay müddətində islah işləri növündə cəza təyin edilib.
Fidan İlqar
