2023-cü ilin sentyabr ayında Qarabağda keçirilən antiterror əməliyyatlarında qəhrəmancasına şəhid olmuş Lerik rayonunun Almu kənd sakini Məhərrəmov Cavadın atası Sadiq Məhərrəmov banka borcu olduğu üçün məhkəməyə verilib.
Cənublu.az Musavat-a istinadən xəbər verir ki, Cavad Məhərrəmov Müddətdən Artıq Xidmət Edən (MAXE) olaraq xidmətdə olub, Vətən torpaqlarının azad olunması uğrunda döyüşlərdə cəngavər kimi döyüşüb və Ağdərənin azad olunması əməliyyatında düşmən snayperi onu ürəyindən vurub.
Şəhid Cavad Məhərrəmov şəhadətə qovuşmazdan öncə ev tikdirmək üçün atasına “Yelo bank”dan 15 min manat kredit götürməyi tövsiyə edib. Bildirib ki, krediti aybaay öz maaşından ödəyəcək, təki atası evin inşaasına başlasın. Ev tikilməyə başlayıb, lain iki aylıq ödənişdən sonra Cavid şəhid olub.
Heç yerdə işləməyən Sadiq Məhərrəmov imkansız vəziyyətdə olması səbəbindən kreditin sonrakı ayları ödənməyib və iş məhkəməyə gedib çıxıb.
Sadiq Məhərrəmov qurumlardan şəhid ailəsinin gerçək durumunu nəzərə salaraq, dəstək göstərməyi xahiş edib.
