Hər il Azərbaycanda istilik mövsümü noyabrın 15-dən etibarən başlayır. Bu isə sakinlərin bir qisminin narazılığına səbəb olur.
Maraqlıdır, bəs görəsən, Azərbaycanda istilik mövsümü vaxtından əvvəl başlaya bilərmi?
"Azəristiliktəchizat" Açıq Səhmdar Cəmiyyətinin (ASC) mətbuat katibi Elvin Basqallı Oxu.Az-ın mövzu ilə bağlı sorğusuna cavab olaraq qeyd edib ki, qazanxanaların vaxtından əvvəl işə salınması məsələsinə konkret halda baxmaq olar:
"5 sentyabr 2023-cü il tarixində Nazirlər Kabineti tərəfindən istilik enerjisi qaydaları təsdiqlənib. Bu qaydalara əsasən, hər il Azərbaycanda istilik mövsümü noyabrın 15-də başlayır və növbəti il aprelin 15-də yekunlaşır. Lakin Azərbaycanın 14 dağlıq və dağətəyi rayon və şəhərində istilik mövsümü noyabrın 1-i başlayır, növbəti ilin mayın 1-də yekunlaşır. Söhbət Şuşa, Laçın, Lerik, Yardımlı, Gədəbəy, Daşkəsən, Şabran, Quba, Qəbələ, Qusar kimi rayon və şəhərlərdən gedir. Əgər ardıcıl olaraq 5 gün havanın temperaturu 8 dərəcədən aşağı olsa və Ekologiya və Təbii Sərvətlər Nazirliyi növbəti günlərdə də havanın belə davam edəcəyi ilə bağlı proqnozu verilərsə, qazanxanaların vaxtından əvvəl işə salınması məsələsinə baxıla bilər".
