Bu gün astaralı Vətən müharibəsi şəhidi Samir Mətləb oğlu Səmədovun anadan olduğu gündür.
O, 2002-ci il yanvarın 18-də Astara rayonunun Pensər kəndində dünyaya göz açıb. Orta təhsilini Astara rayonu Z.Ə.Əhməzadə adına 2 saylı tam orta məktəbdə alıb. Samir 2020-ci il yanvarın 24-də Astara rayon Hərbi komissarlığı tərəfindən həqiqi hərbi xidmətə çağrılıb. Tərtər rayonu "N" saylı hərbi hissəyə göndərilib.
Həmin ilin sentyabrında Vətən müharibəsi zamanı Talış kəndi və Ağdərə rayonu istiqamətində gedən şiddətli döyüşlərdə iştirak edib, düşmənə sarsıdıcı zərbələr endirməklə böyük şücaət və qəhrəmanlıq göstərib. Düşmənin bir çox canlı qüvvəsini məhv edən Samir oktyabrın 10-da itkin düşüb. Nəhayət, noyabrın 18-də Samirin nəşi tapılıb. Məlum olub ki, o, elə itkin düşdüyü gündə şəhid olub. Şəhidin nəşi 2020-ci il noyabrın 19-da Pensər kəndinə gətirilib və Seyid Camaləddin türbəsində torpağa tapşırılıb.
Samir ölümündən sonra “Vətən uğrunda”, “Suqovuşanın azad olunmasına görə”, “Cəsur döyüşçü” medalları ilə təltif edilib.
