Astara Gənclər Evi Sosial Xidmət Müəssisəsində Lənkəran-Astara Regional Gənclər və İdman İdarəsinin və Astara Gənclər Evinin birgə təşkilatçılığı ilə gənclərə insan hüquq, azadlıq və vəzifələrinin öyrədilməsi məqsədilə “Bullinq və onun fəsadları” mövzusunda təlim keçirilib. Bu haqda məlumatı Cenublu.az bu gün, 25 iyul tarixində verir.
Təlim zamanı Lənkəran-Astara Regional Gənclər və İdman İdarəsinin Astara rayonu üzrə Gənclər və İdman Sektorunun, Astara Gənclər Evinin əməkdaşları çıxış edərək, vətəndaş cəmiyyətinin bərqərar olmasında hüquqi maarifləndirmə işinin önəmi, müasir Azərbaycan cəmiyyətində bu sahədə atılan uğurlu addımlardan bəhs ediblər.
Çıxış edənlər iştirakçıları bullinq davranışlar və onun sözlü (verbal), fiziki, psixoloji, kiber növlərinin yeniyetmə və gənclərin sağlamlıq durumunda yaratdığı mənfi dəyişikliklər haqqında, onlarda psixoloji və nevrotik xəstəliklərin yaranması, aqressiv davranışların artması, cinayətə və intihara meyillilik müşahidə edildiyi barədə məlumatlandırıblar.
Sonda mövzu ilə əlaqəli qrup çalışması etdikdən sonra təlimə yekun vurulub.
