İqtisadiyyat Nazirliyi yanında Sahibkarlığın İnkişafı Fondunun xətti ilə ayrılan 1 milyon manat güzəştli kredit hesabına Astara rayonunda 130 hektar ərazidə bağ salınır. Bu haqda məlumatı Cenublu.az bu gün, 9 iyul tarixində Azertac-a istinadən verir.
Bu bağda avokado, manqo, marakuya, Taiti laymı, qreypfrut, pomela, pitaya, papaya və banan və s. xaricdən ölkəmizə idxal olunan meyvələr yetişdiriləcək.
İki mərhələdən ibarət layihə üzrə Astaranın Şüvü və Deqədi kəndləri ərazisində artıq 45 hektarda avokado, 10 hektarda yeni növ limon bağlarının salınması prosesi yekunlaşıb. Bir neçə ay əvvəl isə 2 hektar ərazidə banan ağacları əkilib.
Təsərrüfatda qurulan müasir sistem vasitəsilə açıq havada əkilən banan, manqo və avokado ağaclarını şaxtadan da qorumaq mümkün olacaq.
Daha iki tropik meyvə – pitaya və papaya isə istixana şəraitində yetişdiriləcək. Bu məqsədlə artıq tikinti işlərinə start verilib. İstixananın tikintisi 2 ay ərzində yekunlaşacaq və tinglər əkiləcək.
