Astara rayonunun Rudəkənar kəndində cinsi tam məlum olmayan vəhşi heyvan kənd sakininə hücum edib. Bu haqda məlumatı Cenublu.az bu gün, 2 avqust tarixində Bizim.Media-ya istinadən verir.
Hadisə kənd sakini, 48 yaşlı Gündüz Abdullayevin həyətində baş verib.
Belə ki, itin hürməsini eşidən Gündüz çölə çıxanda əvvəlcə elə bilib ki, hansısa digər kənd iti onun itinə hücum edib. Hadisə yerinə yaxınlaşanda isə naməlum heyvan ovunu buraxıb və onun üzərinə atılıb. Hündür və güclü heyvanın hücumundan əvvəlcə özünü itirib zədələr alan Gündüz son anda müqavimət göstərməyi bacarıb.
Hücuma məruz qalan şəxs heyvanın çənəsini əlləri ilə aralı saxlayaraq onu parçalamasına imkan verməyib. Həmin heyvan Gündüzü bir neçə metr sürüyüb aparmağa çalışıb.
Yalnız Gündüzün həyat yoldaşı bıçaqla hadisə yerinə yaxınlaşdıqdan sonra heyvan qaçıb.
Hadisə nəticəsində müxtəlif xəsarətlər alan kənd sakini qonşuların köməyi ilə Astara rayon Mərkəzi Xəstəxanasına çatdırılıb. Bir çox kənd sakinlərinin fikrinə görə, bu vəhşi heyvan kaftar cinsinə mənsubdur, lakin kifayət qədər hündür və güclüdür.
İlk dəfədir ki, bu heyvan kəndin içərisinə qədər daxil olur.
Astara rayon Mərkəzi Xəstəxanasının Təcili Yardım Bölməsinin şöbə müdiri Turxan Oqtayzadə hücuma məruz qalan şəxsin bölməyə daxil olduqdan sonra yarasının təmizləndiyini və xəstəyə bir neçə tikiş qoyulduğunu bildirib.
Eyni zamanda ona quduzluq əleyhinə vaksin vurulub. Hazırda xəstənin müalicəsi ambulator şəkildə evdə davam etdirilir.
Kənd sakinləri bu hadisədən sonra uşaqların nəzarətsiz qalmamasına çalışdıqlarını bildirərək, kəndi hələ də qorxu altında saxlayan naməlum heyvanın məhv edilməsi üçün müvafiq qurumların müdaxilə etməsini xahiş edirlər.
