Astaranın sitrus bağlarında geniş şəkildə yayılan xəstəliklər məhsuldarlığın azalması və məhsulun alış qiymətlərinin aşağı düşməsi ilə müşahidə edilir.
Cenublu.az xəbər verir ki, buna səbəb bağlarda bölgə üçün xarakterik olmayan yeni həşarat növü – “vampir kəpənəyi”nin yayılmasıdır. Belə ki, adıçəkilən zərərvericilər ağacların yarpaqlarının, cavan budaqlarının şirəsini sorur, nəticədə, gövdə quruyur.
Fermerlərə problem yaradan digər məsələ isə dərmanların keyfiyyəti ilə bağlıdır. Belə ki, baş qaldıran xəstəliklərlə paralel bazarlarda saxta dərman preparatları da çoxalıb. Bəzən bir dərmanın bir neçə variantına rast gəlinsə də, heç birinin təsiri olmur. Fermerlər sertifikatlı və keyfiyyətli dərmanların satışa çıxarılmasını tələb edirlər.
Bioloq Yunus Qulamov da yaranan xəstəlikləri, əsasən, “vampir kəpənəklər”in bağları ağuşuna alması və onlarla mübarizə üçün nəzərdə tutulan dərman peraparatlarının keyfiyyətinin aşağı olması ilə əlaqələndirir: “Xəstəliyin qarşısını almaq mümkündür, lakin bu, kompleks şəkildə aparılmalıdır. Belə ki, bütün fermerlər eyni vaxtda bağlarını dərmanlasalar, zərərvericilərin kökünü kəsmək olar”.
Qeyd edək ki, fermerlər ötən illərdə bağlardan 5-10 ton məhsul götürürdülərsə, bu il 1,5-2 ton məhsul əldə edəcəklərini güman edirlər.
