Xəbər verdiyimiz kimi, Xalq artisti Ağadadaş Ağayevlə “Medera” hospitalının mühafizəçisi N.Cəlilov arasında insident yaşanıb.
Jurnalist Məhəmmədəli Qəribli hadisə ilə bağlı bəzi detalları açıqlayıb:
“Hadisə 22 iyulda səhər saatlarında baş verib. Hadisə gecəsi isə Ağadadaş Ağayev məhz “Medera”da əməliyyat olunub. Ağadadaş Ağayev “Medera” ilə çox yaxın məsafədə yerləşən, özünə məxsus olan “Büsat” şadlıq evinin həyətində özünə ikimərtəbəli ev tikdirib, orada yaşayır.
Hadisənin baş verdiyi günün gecəsi Xalq artisti içkili vəziyyətdə öz evində yıxılır və qulağını zədələyir. Onu gətirirlər “Medera”ya və gecə qulağına 6 tikiş qoyurlar. Hətta MRT də olunur. Əməliyyatı da əslən Masallıdan olan bir həkim edib. Bildirilir ki, bütün bunların müqabilində Ağadadaş Ağayev “Medera”ya 1000 manat pul ödəyir. Səhər baxır ki, qulağında ağrı var, mühafizəçidən xahiş edir ki, evə bir tibb bacısı göndərsin. Nəticədə kobud cavab alır. Sonrasını da bilirsiniz”.
Daxili İşlər Nazirliyinin (DİN) Mətbuat Xidmətindən bildirilib ki, paytaxtın Binəqədi rayonunda baş verən insidentlə əlaqədar araşdırma aparılır: "Fakta görə Cinayət Məcəlləsinin xuliqanlıq maddəsi ilə cinayət işi başlanılıb. Münaqişə tərəfləri N.Cəlilov və A.Ağayev cinayət məsuliyyətinə cəlb ediliblər. Cinayət işi üzrə istintaq hərəkətləri davam etdirilir".
Qeyd edək ki, Ağadadaş Ağayev əslən Cəlilabad rayonunun Hasıllı kəndindəndir.
