Astara rayon sakini Röyal Mirzəyevin 2009-cu ildə kreditlə aldığı mobil telefonu 15 ildən sonra onun üçün problemə çevrilib. Bu haqda məlumatı Cenublu.az bu gün, 30 iyul tarixində XəzərXəbər-ə istinadən verir.
R.Mirzəyev 2009-cu ildə rayonda mobil telefon satışı ilə məşğul olan mağazaların birindən 12 ay müddətinə kredit yolu ilə telefon alıb. Sakinin dediklərinə görə, o, 2009-cu ildə hər ay müqavilə şərtlərinə uyğun telefonun kreditini mağazaya ödəyib, lakin onun banka 787 manat borcu yaranıb. Bu səbəbdən bank R. Mirzəyevi Astara Rayon Məhkəməsinə verib.
Zərərçəkmiş məhkəmənin keçirilməsindən onun xəbərsiz olduğunu və onun iştirakı olmadan qərar qəbul edildiyini bildirir.
Əlavə olaraq, şikayətçi bildirir ki, həmin mağazanın sahibkarı onunla yanaşı, 30-a yaxın vətəndaşın mağazadan aldıqları mobil telefon üçün ödədikləri kredit məbləğini banka ödəməyib.
Hazırda rayon ərazisində eyni adda mobil telefon dükanı fəaliyyət göstərmir. Həmin adıçəkilən şəxslərlə isə əlaqə saxlamaq mümkün olmadı.
Astara Rayon Məhkəməsi borcu onun ödəməsi ilə bağlı qərar qəbul edib.
Hüquqşünaslar bildirirlər ki, vətəndaş qərardan narazıdırsa, mütləq Apellyasiya Məhkəməsinə müraciət etməlidir. Sübutlar təqdim edilsə, ödəniş ondan tələb olunmaya bilər.
