Ağcabədidə yeniyetmə qızla evlənən oğlana cəza verilib.
Cenublu.az-ın əldə etdiyi məlumata görə, hadisənin istintaqı Lənkəran Ağır Cinayətlər Məhkəməsində keçirilib.
Belə ki, təqsirləndirilən Qabil Əliyev (ad şərtidir) 2001-ci ildə Ağcabədidə anadan olub. O, ötən ilin may ayında yaşadığı evdə həmkəndlisi, 14 yaşlı Nəzrin Qurbanova (ad şərtidir) ilə cinsi əlaqəyə girib. Daha sonra may ayı ərzində iki dəfə təkrarən cinsi əlaqədə olub.
Qabil Əliyev Azərbaycan Respublikası CM-nin 152.4.1-ci maddəsi ilə təqsirləndirilib.
Məhkəmədə təqsirləndirilən şəxs qismində dindirilən Qabil Əliyev özünü təqsirli bilib. İfadəsində göstərib:
“Nəzrin həm qonşum, həm də həmkəndlimdir. Onunla bir-birimizi görüb bəyənmişdik. Sevgi münasibəti yaşayırdıq. Onu sevdiyimi və evlənmək istədiyimi anama dedim. O da Nəzrinin anasına məlumat verdi. Ailələrin razılığı ilə 2024-cü ilin aprel ayında Nəzringilin evində nişan etdik. Valideynlərimiz qız on səkkiz yaşa çatdıqda rəsmi nikaha daxil olacağımızı bildirdilər. Bir müddət keçəndən sonra Nəzrin evlənmək üçün tələsdirməyə başladı. Mənə dedi ki, cinsi əlaqədə olacağımız halda ailələr nikaha icazə verəcəklər. Bunu deyərək cinsi əlaqədə olmağı təklif etdi. Mən də onun istəyi ilə cinsi münasibətdə oldum. Onun razılığı ilə həmin ay iki dəfə cinsi əlaqədə olduq. Amma düşünmürdüm ki, buna görə həbsə atılım.
Bir neçə ay sonra Nəzrin hamilə olduğunu dedi, buna görə ailədaxili toy etdik. Hamiləliyinin 5-ci ayında xəstəxanaya aparanda polis əməkdaşları məni tutdu”.
Məhkəmə baxışı zamanı iş üzrə zərərçəkmiş Nəzrin Qurbanova ifadə verib:
“Qabillə bir-birimizi görüb sevdik. Bir müddət keçdikdən sonra hər ikimiz ailəmizə bildirdik və onun anası bizə elçi gəldi. Aprelin 21-i nişanlandıq. May ayında öz razılığımla Qabillə cinsi əlaqədə oldum. Bundan bir müddət sonra hamilə olduğumu bildim, bu barədə anama və Qabilə məlumat verdim. Ailə içində toy etdik və mən Qabilgilnən yaşamağa başladım. Yoxlanış üçün xəstəxanaya müraciət etdiyim üçün polislər xəbər tutdu”.
Sonda məhkəmənin qərarı ilə Qabil Əliyevə 6 il müddətində şərti cəza verilib.
Fidan İlqar
