Lənkəranda işlədiyi sexdə yıxılaraq dünyasını dəyişən 31 yaşlı Elgün Rzazadə barədə bəzi detallar məlum olub. Məhrumun qohumu Eldar Alxaslının Cenublu.az-a verdiyi açıqlamada bildirib ki, hadisə nəticəsində Elgün qolundan və başından zədə alıb:
“Elgün mənim qaynımın yeznəsidir, elə mənim də yeznəmdir. Çox çevik uşaq idi. Özü də qazi idi. Saat axşam saat 7 radələrində mənə məlumat çatdı ki, Elgün tikintidə yıxılaraq xəsarət alıb və xəstəxanaya aparılıb. Xəstəxanaya çatanda gördüm ki, artıq vəfat edib. Hikmət həkim məni çağırıb dedi ki, əlimizdən gələni eləmişik. Onun bir qolunda zədə var idi, bir də başında, başqa heç bir yerində zədə yox idi.”
Lənkəran Rayon Mərkəzi Xəstəxanasının ictimaiyyətlə əlaqələr üzrə mütəxəssisi Zamin Rzayev bildirib ki, mərhum ağır vəziyyətdə gətirilib:
“07.10.2024-cü il tarixində saat 15:05 radələrində Lənkəran rayonu Bəlləbur kəndində baş vermiş bədbəxt hadisə nəticəsində 1 nəfər (kişi cinsli) şəxs sağ mil sümüyünün distal ucunun sınığı, kürək sümüyünün sınığı, qapalı kəllə beyin travması diaqnozu ilə Lənkəran Rayon Mərkəzi Xəstəxanasının təcili yardım şöbəsinə hospitalizasiya olunub. Yaralıya zəruri ilkin tibbi xidmətlər göstərilib, vəziyyətinə uyğun olaraq reanimasiya şöbəsinə yerləşdirilib. Qeyd edək ki, bütün reanimasyon tədbirlərə baxmayaraq yaralının həyatını xilas etmək mümkün olmayıb”.
Meyit aidiyyəti üzrə təhvil verilib. Faktla bağlı araşdırma aparılır.
Qeyd edək ki, Elgün Rzazadə Vətən müharibəsinin iştirakçısı idi. O, Şuşa uğrunda gedən döyüşlərdə vuruşub. Göstərdiyi şücaətə görə medalla təltif olunub.
Elgün Rzazadə ailəli olub və iki övladı var.
Ətraflı teleqram kanalımızda:
