Neftçalada gənc oğlan qohumunun evindən oğurluq etdiyi üçün məsuliyyətə cəlb olunub.
Cenublu.az xəbər verir ki, hadisə şəhər ərazisində qeydə alınıb. 21 yaşlı Əzim Mustafayev (ad və soyad şərtidir) xalasının evinə daxil olaraq pul oğurlayıb.
Təqsirləndirilən şəxsin ifadəsinə görə, hadisə baş verən gün anasının ad günü olub və xalasıgil onu təbrik etməyə gəlib. Maddi imkanı olmadığı üçün axşam saatlarında Əzim qohumunun yaşadığı evə gedərək pəncərədən mənzilə daxil olub. Ayrı-ayrı otaqlardan ümumilikdə 1 340 manat götürərək evi tərk edib. O, pulun 29 manatını yolda yeməyə xərcləyib, qalan məbləği isə könüllü şəkildə polisə təhvil verib.
Zərərçəkmiş şəxs məhkəmədə ona dəymiş ziyanın tam ödənildiyini bildirərək təqsirləndirilən şəxsə qarşı şikayət və tələbinin olmadığını deyib.
Məhkəmənin hökmü ilə Əzim Mustafayevə 1 il 11 ay 26 gün müddətinə azadlığın məhdudlaşdırılması cəzası təyin edilib.
