Sabirabad rayonunda 35 yaşlı İqbal bacısının həyat yoldaşı Vüqarı küçədə yumruqla vuraraq ona xəsarət yetirib.
Hadisədən təxminən iki ay əvvəl tərəflər arasında mübahisə baş vermiş, lakin həmin vaxt onlar barışmışdılar. İqbal daha sonra ifadəsində bildirib ki, son görüş zamanı həmin mübahisə və təhqirlər yadına düşdüyü üçün qisas niyyəti ilə hərəkət edib.
Zərərçəkmiş Vüqar da bildirib ki, həmin gün həmkəndlisinin oğlunun əsgər yolasalma mərasimindən çıxıb çayxanaya gedərkən İqbal ona yaxınlaşaraq heç nə demədən yumruq vurub. O, hadisə barədə 102 xidmətinə məlumat verib.
Daha sonra İqbal zərərçəkmişə dəyən ziyanı ödəyib, ondan üzr istəyib və tərəflər barışıblar. Vüqar da şikayətçi olmadığını bildirib.
Sabirabad Rayon Məhkəməsinin hökmü ilə Cinayət Məcəlləsinin 73.2-ci maddəsinə əsasən təqsirləndirilən şəxs cinayət məsuliyyətindən azad edilib və cinayət işi üzrə icraata xitam verilib.
Adlar şərtidir.
