Sabirabadda söyüşə görə həmkəndlisinin başını bədənindən ayıran şəxsə hökm oxunub.
Cenublu.az-ın məlumatına görə, hadisə rayonun Moranlı kəndində qeydə alınıb.
İstintaq materiallarına əsasən, hadisədən əvvəl tərəflər Şirvan şəhərində yerləşən şadlıq sarayında keçirilən toy məclisində iştirak ediblər. Məclisdən sonra sərxoş vəziyyətdə olan təqsirləndirilən 33 yaşlı Əli Əliyevlə digər toy iştirakçıları arasında mübahisə yaranıb. Bu zaman qətlə yetirilən 42 yaşlı Rüstəm Əliyev ona irad bildirib, aralarında gərginlik yaşanıb.
Əli Əliyev məclisdən evinə qayıtdıqdan sonra Rüstəm Əliyevdən qisas almaq qərarına gəlib. O, telefonla zəng edərək həmkəndlisini görüşə çağırıb və özü ilə mətbəx bıçağı götürərək təyin olunan ünvana yollanıb.
Görüş zamanı tərəflər arasında yenidən mübahisə yaranıb. Təqsirləndirilən şəxs Rüstəm Əliyevə baş və bədəninin müxtəlif nahiyələrinə ümumilikdə 33 bıçaq zərbəsi endirib. Daha sonra zərərçəkmişin başını kəsərək bədənindən ayırıb.
Məhkəmədə ifadə verən Əli Əliyev özünü təqsirli bilib. O bildirib ki, toy məclisində Rüstəm Əliyevin onu vurması və təhqir etməsindən sonra ondan qisas almaq istəyib. Onun sözlərinə görə, görüşə gedərkən bıçağı da özü ilə aparıb və qarşı tərəfin onu yenidən təhqir edəcəyi halda öldürmək niyyətində olub.
Mərhumun hüquqi varisi isə məhkəmədə hadisənin toy məclisində başlayan mübahisənin davamı olduğunu bildirib. Onun sözlərinə görə, hadisə yerinə çatanda Rüstəm Əliyevin meyiti ilə qarşılaşıblar və meyitin başı bədənindən ayrılmış vəziyyətdə olub.
Lənkəran Ağır Cinayətlər Məhkəməsinin hökmü ilə təqsirləndirilən şəxs Cinayət Məcəlləsinin xüsusi amansızlıqla qəsdən adam öldürmə maddəsi ilə təqsirli bilinərək 19 il müddətinə azadlıqdan məhrum edilib.
Əsmər Sənani
