Rusiyada 24 il əvvəl baş verən qətl hadisəsi ilə bağlı Lənkəran sakini Kamran Həbibovun barəsindəki qərardan kassasiya şikayəti verilib.
Şikayət Ali Məhkəmənin hakimi İlkin Abdullayevin sədrliyi ilə araşdırılacaq.
İttihama görə, Kamran Həbibov 1994-cü ildə Rusiyanın Sankt-Peterburq şəhərinə köçərək orada yaşamağa başlayıb. O, Rusiya vətəndaşı Natalya Fasiy ilə qeyri-rəsmi ailə münasibətində olub və onların bu münasibətdən uşaqları dünyaya gəlib.
Hadisə isə 2002-ci ildə baş verib. Bildirilir ki, Natalyanın qardaşı Ruslanla aralarında mübahisə yaranıb və Ruslan onu çubuqla vurub. Bundan sonra Kamran qisas məqsədilə onların evinə gedib. Orada Natalyanın atası Aleksey ilə mübahisə edib və mübahisə zamanı ona bıçaqla xəsarət yetirərək öldürüb.
Hadisədən sonra Kamran Azərbaycana qayıdıb və uzun illər axtarışda olub. O, yalnız 2024-cü il dekabrın 9-da Azərbaycanda cinayət məsuliyyətinə cəlb edilib.
Şirvan Apellyasiya Məhkəməsində onun cəzası 13 ildən 8 ilə endirilib.
Mənbə: Pravda.аz
