Şirvan Apellyasiya Məhkəməsində hakimiyyət nümayəndəsinə qarşı zor tətbiq etməkdə təqsirləndirilən Azad Həsənovun barəsindəki hökmdən verilən apellyasiya şikayətinə baxılıb.
İttihama görə, hadisə bu ilin iyununda gecə saatlarında İmişlidə baş verib. Azad Həsənov avtomobili narkotik vasitənin təsiri altında və uzaq işıqlarla idarə edərkən yol polisi tərəfindən saxlanılıb. Polis əməkdaşları onu müayinədən keçməyə çağırsa da, o, hadisə yerindən uzaqlaşmağa cəhd edib. Yol patrul əməkdaşlarından biri avtomobilin hərəkətə başlamasının qarşısını alıb.
Bundan sonra sürücü avtomobildən düşərək qaçmağa çalışıb. Polis əməkdaşları onu saxlayarkən Azad bıçaq çıxarıb. Müqavimət göstərərkən tərəflər yerə yıxılıblar. Həmin vaxt Azad Həsənov özünə də bıçaqla xəsarətlər yetirib. Polis əməkdaşı bıçağı onun əlindən almağa çalışarkən isə sürücü inspektorun sağ baldır nahiyəsinə zərbə endirib. Ekspertiza xəsarəti sağlamlığın qısa müddətə pozulmasına səbəb olan yüngül bədən xəsarəti kimi qiymətləndirib.
Hadisədən sonra o qaçsa da, sonradan saxlanılaraq cinayət məsuliyyətinə cəlb edilib. Məhkəmədə Azad ittiham üzrə özünü qismən təqsirli bildiyini deyib.
Məhkəmə şikayəti təmin etməyib. Ona 2 il 8 ay azadlıqdan məhrumetmə cəzası təyin edilib.
Adlar şərtidir.
Mənbə: Pravda.az
