Bakı şəhəri Binəqədi rayonunda yerləşən 248 nömrəli tam orta məktəbdə baş verən hadisə ilə bağlı məktəbli cinayət məsuliyyətinə cəlb edilib.
Lənkəran rayonu Haftoni kəndində anadan olan 2008-ci il təvəllüdlü Ruslan barəsində Cinayət Məcəlləsinin xuliqanlıq və qəsdən sağlamlığa az ağır zərər vurma maddələri ilə iş açılıb. Araşdırmaya görə, 11-ci sinif şagirdi olan Ruslan 10-cu sinifdə oxuyan Uğura hücum edib.
Hadisəyə səbəb kimi Ruslanın Uğurun ona baxdığını və əli cibində danışdığını iddia etməsi göstərilir. O, Uğurdan üzr istəməsini tələb edib, lakin tələb yerinə yetirilmədikdə onu cəzalandırmaq qərarına gəlib. Ruslan dostları ilə birlikdə məktəb yoldaşına hücum edərək ona zərbələr endirib.
Nəticədə Uğurun burun nahiyəsində ciddi xəsarətlər yaranıb.
Araşdırma zamanı məlum olub ki, zərərçəkmişin bacısı Ruslanla eyni sinifdə oxuyur və bir neçə il əvvəl Ruslan həmin qız barədə sosial şəbəkədə xoşagəlməz paylaşımlar edib.
İş Binəqədi Rayon Məhkəməsində araşdırılıb. Zərərçəkmiş tərəf ona ağır cəza verilməsini tələb edib.
Məhkəmənin hökmü ilə Ruslan Səmidov təqsirli bilinib, 2 il müddətinə azadlığın məhdudlaşdırılması cəzası alıb və ayağına elektron qolbaq taxılıb.
Qeyd edək ki, adlar şərtidir.
