Ali Məhkəmədə dələduzluqda təqsirləndirilən Masallı Viləşçay Su Anbarı İstismar İdarəsinin keçmiş əməkdaşı Cavid Şirəliyevin kassasiya şikayətinə baxılıb.
Hakim İlqar Qılıcovun sədrliyi ilə keçirilən iclasda qərar elan olunub. Məhkəmə kassasiya şikayətini təmin etməyib və əvvəlki qərar qüvvədə saxlanılıb.
İstintaq materiallarına görə, 1983-cü il təvəllüdlü Cavid Şirəliyev həm də 7gun.org saytının rəhbəri olub. O, 2012–2014-cü illərdə "7 Gün Xəbər" qəzetinə rəhbərlik edib, daha sonra fəaliyyətini onlayn formada davam etdirib.
İttihama əsasən, Masallının Ərkivan qəsəbəsində yaşayan Cavid Şirəliyev həmyerlisi, Rusiya vətəndaşı Ağagül Nəsirovu aldadaraq ondan 68 min manat alıb. Bildirilir ki, o, zərərçəkmişə Masallıda fəaliyyət göstərən bazarda tikilən "Sərfəli" ticarət mərkəzinə müdir təyin ediləcəyi vədini verib. Pulun Nərimanov rayonu ərazisində dələduzluq yolu ilə ələ keçirildiyi qeyd olunur.
Məhkəmədə Cavid Şirəliyev özünü təqsirli bilmədiyini, irəli sürülən iddiaların həqiqəti əks etdirmədiyini deyib.
Araşdırma zamanı onun əvvəllər "hədə-qorxu ilə tələb etmə" cinayətinə görə də məhkum olunduğu müəyyən edilib.
Bakı Ağır Cinayətlər Məhkəməsinin hökmü ilə Cavid Şirəliyev 7 il həbs cəzasına məhkum edilib.
