Masallı Rayon Məhkəməsinin hakimi Ellara Abbasovaya qarşı aqressiv davranış edən şəxs inzibati qaydada həbs olunub.
1998-ci il təvəllüdlü Masallı şəhər sakini Murad Əzizov hadisəni qardaşı İzzət Orucova çıxarılan məhkəmə hökmündən sonra törədib.
İş materiallarına görə, Murad Əzizov məhkəmə binasının pilləkənlərində hakim Ellara Abbasovaya yaxınlaşaraq yüksək səslə etiraz edib, qardaşı barədə ədalətsiz qərar verildiyini deyib və hakimin üzərinə doğru hərəkət edib.
Polis əməkdaşları onu hakimdən uzaqlaşdırmağa çalışsalar da, Murad aqressiv davranışını davam etdirib və polisin qanuni tələblərinə tabe olmayıb. Bundan sonra barəsində xırda xuliqanlıq və polisə tabe olmama maddələri ilə protokol tərtib edilərək iş məhkəməyə göndərilib.
Masallı Rayon Məhkəməsinin sədri və hakimləri qərəzsizliklə bağlı hər hansı şübhənin yaranmaması üçün işə baxmaqdan imtina ediblər. Buna görə də materiallar baxılması üçün Cəlilabad Rayon Məhkəməsinə göndərilib.
Məhkəmədə Murad Əzizov təqsirini etiraf edib, əməlindən peşman olduğunu bildirib. Qərara əsasən, Masallı sakini bir ay müddətinə inzibati qaydada həbs olunub.
Mənbə: Xitab24.аz
