Biləsuvarda keçmiş yeznəsini tüfənglə güllələyərək öldürməyə cəhddə təqsirləndirilən Emin Kərimli 11 il 3 ay müddətinə azadlıqdan məhrum edilib.
Məhkəmə araşdırması zamanı məlum olub ki, Emin Kərimlinin bacısının keçmiş həyat yoldaşı, həm də xalası oğlu Elçin Əmənov boşandıqdan sonra başqa bir qadınla ailə qurmağa hazırlaşırmış. Təqsirləndirilən şəxs isə bunu qəbul etməyərək ondan qisas almaq qərarına gəlib.
İstintaqa görə, Emin Kərimli idarə etdiyi "Mercedes" markalı avtomobillə Elçin Əmənovun olduğu küçəyə gəlib və ov tüfəngi ilə ona atəş açıb. Güllə Elçinin sağ əlinə dəyib. Emin cinayət niyyətini başa çatdıra bilməyib.
Məhkəmədə Elçin Əmənov Emin Kərimlidən şikayətçi olmadığını bildirib. Buna baxmayaraq, məhkəmə cinayətin xarakterini və ictimai təhlükəliliyini nəzərə alaraq Emin Kərimlini qəsdən adam öldürməyə cəhddə təqsirli bilərək 11 il 3 ay azadlıqdan məhrum edib.
