Bakının Nizami rayonunda kişi keçmiş həyat yoldaşını döydüyünə görə məhkəmə qarşısına çıxarılıb.
Demokrat.аz xəbər verir ki, hadisə ötən il yanvarın 27-də baş verib. Cəlilabad rayonu sakini, 37 yaşlı Səid (ad şərtidir) səhər saatlarında küçədə keçmiş həyat yoldaşı ilə mübahisə edib. Mübahisəyə səbəb kişinin yenidən barışmaq istəməsi, qadının isə bundan imtina etməsi olub.
İstintaq materiallarına görə, Səid qadının boğazından tutaraq onu sıxıb, sifət və əl nahiyələrinə yumruq zərbələri endirib.
Onun barəsində Cinayət Məcəlləsinin 128-ci maddəsi ilə cinayət işi açılıb. Lakin məhkəmədə tərəflərin barışdığı bildirilib. Nizami Rayon Məhkəməsinin qərarı ilə cinayət təqibinə xitam verilib və o, məsuliyyətdən azad olunub.
