1991-ci il təvəllüdlü Sabirabad rayon sakini Murad iki qadını intim görüntülərlə şantaj etməkdə ittiham olunub. İstintaqa görə, o, 2023-cü ilin iyul-avqust aylarında "Instagram"da tanış olduğu Bakı şəhəri, Binəqədi rayonunda yaşayan Günayı ona göndərdiyi fotonu yaymaqla hədələyib və bu yolla ümumilikdə 1500 manat pul alıb. 2024-cü ilin yanvarın 19-da isə "Instagram"da tanış olduğu Balakən sakini Nuranəni də eyni üsulla hədələyərək ondan 400 manat alıb.
Murad ittihamları qəbul etməyib. O bildirib ki, qadınlardan pulu hədə-qorxu ilə deyil, borc kimi alıb, yazışmalarda onların pulu geri istədiyini də buna sübut kimi göstərib. Deyib ki, şəkillər ona könüllü göndərilib, heç birini yaymayıb və belə bir niyyəti olmayıb. Onun sözlərinə görə, münasibətlər əvvəl normal olub.
Zərərçəkmişlər isə fərqli danışıb. Nuranə bildirib ki, Murad əvvəl normal davransa da, sonradan şəkillərini porno saytlarda yaymaqla hədələyərək pul tələb edib. Qorxduğu üçün ona əvvəl 100, sonra 300 manat göndərib, lakin Murad daha sonra əlavə 500 manat da istəyib və təhqirlərə davam edib.
Günay isə qeyd edib ki, əvvəl münasibətləri normal olub, lakin Murad onun şəklinin ekran görüntüsünü saxlayaraq şantaja başlayıb, şəkillərini porno səhifələrdə paylaşacağını deyib. O, müxtəlif vaxtlarda 300 və 100 manat göndərsə də, Murad sonradan yenidən 500 manat tələb edib, tez-tez zəng edərək təzyiq göstərib və hədələyib.
Şəki Ağır Cinayətlər Məhkəməsinin hökmü ilə Murad təkrar hədə-qorxu ilə tələb etmədə təqsirli bilinib və 5 il 6 ay müddətinə azadlıqdan məhrum edilib.
Qeyd edək ki, adlar şərtidir.
