Bakının Qaradağ rayonunda yerləşən "Borçalı" kafesində qadın işçilər arasında yaranan mübahisə cinayət işi ilə nəticələnib.
İmişli rayon sakini, 1998-ci il təvəllüdlü Ləman işlədiyi kafenin mətbəxində həmkarı Süsənlə mübahisə edib. Mübahisəyə səbəb müştərilərin sifariş etdiyi gürcü xəngəlini bəyənməyərək geri qaytarması olub.
Ləmanın sözlərinə görə, ofisiant işləyən Süsən yeməyi geri gətirdikdən sonra kafenin sahibi ona irad bildirib. Bundan sonra əsəbiləşən qadın Süsənin müdirin yanında bu barədə danışmasına etiraz edib və aralarında mübahisə yaranıb.
Təqsirləndirilən şəxs ifadəsində bildirib ki, mübahisə zamanı Süsənin saçından tutaraq dartıb, baş və boyun nahiyəsinə əl zərbələri endirib. Zərərçəkmiş Süsən də ifadəsində Ləmanın onu yerə yıxdığını və yerdə olarkən də vurduğunu deyib.
Hadisədən sonra cinayət işi açılsa da, tərəflər sonradan barışıblar. Süsən məhkəməyə ərizə təqdim edərək şikayətini geri götürdüyünü və vurulan ziyanın ödənildiyini bildirib.
Qaradağ Rayon Məhkəməsinin qərarı ilə Ləman cinayət məsuliyyətindən azad edilib və cinayət təqibinə xitam verilib.
Qeyd edək ki, adlar şərtidir.
