İmişlidə atasının qətlini sifariş edən şəxslə bağlı yeni hökm çıxarılıb.
Xələf Fərəcovun qətlinin sifariş olunması işi üzrə məsuliyyətə cəlb edilən dördüncü şəxs – Vüsal Məmmədovun məhkəmə prosesi başa çatıb.
İstintaqla müəyyən olunub ki, Xələf Fərəcovun oğlu Fəqan Fərəcov atasını öldürmək üçün 60 min manat qarşılığında sifariş verib. Planın icrası üçün o, tanışı İlkin Hüseynovla əlaqə saxlayıb. İlkin isə Belarusda yaşayan Vüsal Məmmədovu tapıb. Sonradan işə daha bir icraçı – Fariz İsmayılov cəlb olunub.
Razılaşmaya görə, məbləğin 30 min manatı icraçılara çatmalı, qalan hissə isə vasitəçilər arasında bölünməli idi. Cinayət elə təşkil edilməli idi ki, guya Xələf Fərəcov elektrik cərəyanı vurması nəticəsində ölüb.
İlkin və Fariz hadisəni həyata keçirmək üçün İmişliyə gəlsələr də, yaxınlıqda hərəkət edən bir qonşunu görüb ifşa olunmaqdan ehtiyat edərək planı yarımçıq qoyublar.
Bundan sonra sifarişçi Fəqan Fərəcov icraçılardan narazı qalaraq yazışmalarda onları bacarıqsızlıqda ittiham edib, hətta Vüsal Məmmədovun şəxsən gəlib işi görməsini tələb edib. Digər mesajlarda isə o, cinayətin necə həyata keçirilməsi barədə təlimatlar verib və zərərçəkənin evdən çıxma vaxtı ilə bağlı məlumat ötürüb.
Qeyd edək ki, iş üzrə Fəqan Fərəcov, İlkin Hüseynov və Fariz İsmayılov daha əvvəl mühakimə olunublar. Hadisədən sonra Belarusa qaçan Vüsal Məmmədov isə sonradan saxlanılaraq Azərbaycana ekstradisiya edilib.
Lənkəran Ağır Cinayətlər Məhkəməsinin hökmü ilə o, 7 il 6 ay azadlıqdan məhrum edilib.
