Özünü ölü göstərərək məsuliyyətdən yayınmağa çalışan MTK direktorunun cəhdləri nəticəsiz qalıb.
Ali Məhkəmə "Kaspian İnşaat MB" MTK-nın direktoru Rafət Qəniyevin kassasiya şikayətini təmin etməyib və əvvəlki hökm qüvvədə saxlanılıb.
Hadisə 2021-ci ilin noyabrında Sabirabad rayonunda yol kənarında yanmış avtomobildə insan sümüklərinə bənzər qalıqların aşkarlanması ilə başlayıb. Araşdırma zamanı avtomobilin Rafət Qəniyevə məxsus olduğu müəyyən edilib və onun öldüyü ehtimal olunub.
Lakin sonrakı istintaq tam fərqli mənzərə ortaya çıxarıb. Məlum olub ki, Rafət Qəniyev rəhbərlik etdiyi tikinti şirkətinin mənzil satışları ilə bağlı dələduzluq ittihamlarından yayınmaq üçün avtomobilini qəsdən yandırıb, içinə isə mənşəyi bilinməyən heyvan sümükləri yerləşdirərək öldüyü görüntüsünü yaradıb.
Hüquq-mühafizə orqanlarının keçirdiyi əməliyyat tədbirləri nəticəsində onun yeri müəyyən edilib.
İstintaqla ona külli miqdarda dələduzluq ittihamı irəli sürülüb. Bakı Ağır Cinayətlər Məhkəməsinin hökmü ilə Rafət Qəniyev 8 il müddətinə azadlıqdan məhrum edilib. Ali Məhkəmə də bu qərarı qüvvədə saxlayıb.
