Neftçala sakini 27 yaşlı Samir bacısına xəsarət yetirib. Hadisə bu il yanvarın 9-da gecə saat 1 radələrində onun yaşadığı evdə baş verib. Məlumata görə, Samir evə dostunu dəvət edib və evə kənar şəxs gətirdiyi üçün bacısı Nəsibə ilə aralarında mübahisə yaranıb. Mübahisə qısa müddətdə şiddətlənərək davaya çevrilib.
Samir əsəbiləşərək bacısına hücum edib və onu döyüb. Zərbələr nəticəsində Nəsibənin sifət, boğaz, sinə, qol və bədəninin müxtəlif nahiyələrinə xəsarətlər yetirilib. Faktla bağlı Samirə qarşı Cinayət Məcəlləsinin qəsdən sağlamlığa zərər vurma ittihamı irəli sürülüb.
İş Abşeron Rayon Məhkəməsində araşdırılıb. Məhkəmə prosesində məlum olub ki, tərəflər barışıq əldə ediblər. Zərərçəkmiş şəxs Samirdən şikayətçi olmadığını bildirərək ərizəsini geri götürüb. Bu səbəbdən məhkəmə Cinayət Məcəlləsinin 73.2-ci maddəsinə əsasən Samiri cinayət məsuliyyətindən azad edib və iş üzrə icraata xitam verilib.
Qeyd edək ki, Samir əvvəllər də məhkum olunub. O, 2025-ci ilin noyabrında oğurluq maddələri ilə 2 il müddətinə azadlığın məhdudlaşdırılması cəzası almışdı.
Təqdim olunan adlar şərtidir.
