Şirvan Apellyasiya Məhkəməsində əmisini öldürməkdə təqsirləndirilən Elşən Hüseynzadənin barəsindəki hökmdən verilən apellyasiya şikayəti üzrə məhkəmə prosesi başa çatıb.
Hakim Cavid Sultanovun sədrliyi ilə keçirilən prosesdə qərar elan edilib.
Qərara əsasən, apellyasiya şikayəti təmin edilməyib.
İttihama əsasən, hadisə Lənkəranın Vilvan kəndində baş verib. Kənd sakinləri Vəliağa Səbziyev və qardaşı Hüseynqulu ata evində yaşayıblar. Ataları vəfat etdikdən sonra Vəliağa özü üçün ayrıca ev tikdirsə də, ata evini də miras kimi öz adına rəsmiləşdirib. Buna baxmayaraq, Hüseynqulu və ailəsi həmin evdə qalmaqda davam edib.
Bir müddət sonra qardaşlar arasında münasibətlər gərginləşib. Vəliağa qardaşının ailəsindən ata evini tərk etməyi tələb edib. Lakin gedəcək başqa yerləri olmadığı üçün onlar evdən çıxmayıblar. Mübahisələr getdikcə kəskin xarakter alıb.
Ötən il mayın 29-da Hüseynqulunun oğlu Elşən əmisi Vəliağanı öldürmək qərarına gəlib və 15 bıçaq zərbəsi vuraraq onu qətlə yetirib.
Məhkəmənin hökmü ilə Elşən Hüseynzadə 17 il müddətinə azadlıqdan məhrum edilib.
Mənbə: pravda.аz
