Cəlilabad rayonunda qonşular arasında yaranan mübahisə ağır xəsarətlə nəticələnib. 2000-ci il təvəllüdlü Mahir qonşusu Dadaşı (adlar şərtidir) bıçaqladığına görə azadlıqdan məhrum edilib.
Hadisə 18 fevral 2023-cü il tarixdə, axşam saatlarında Cavadxan küçəsində baş verib. Mahir öz itini küçədə boruya bağlayaraq mağazaya gedib. Qayıdanda isə itin ipinin açıldığını və ətrafdakılara hücum etdiyini görüb. O, iti açan naməlum şəxsin ünvanına ucadan nalayiq ifadələr işlədib.
Bu zaman qonşusu Dadaş yaxınlaşaraq söyüşə etiraz edib və ailəsinin həmin sözləri eşitdiyini bildirib. Mahir səhvini etiraf edərək üzr istəsə də, tərəflər arasında mübahisə böyüyüb. Qonşular onları ayırsa da, təxminən yarım saat sonra Dadaş tanışı ilə birlikdə Mahirin olduğu fermaya gəlib və mübahisə yenidən alovlanıb.
Mahir bildirib ki, qarşı tərəfin onu itələyib vurmasından sonra üzərində gəzdirdiyi cib bıçağı ilə Dadaşa bir dəfə qarın, bir dəfə isə ayaq nahiyəsindən zərbə vurub. Zərərçəkmiş xəstəxanaya çatdırılıb, Mahir isə polis əməkdaşlarını gözləyib.
Məhkəmə Mahirin əməlini əvvəlcə xuliqanlıq niyyəti ilə törədilmiş ağır xəsarət kimi qiymətləndirsə də, sonradan Cinayət Məcəlləsinin 126.1-ci maddəsinə – qəsdən sağlamlığa ağır zərər vurma maddəsinə tövsif edib. O, 3 il müddətinə azadlıqdan məhrum olunub, xuliqanlıq maddəsi üzrə isə bəraət alıb.
Təqsirləndirilən şəxsin müdafiəçisi cəzanın şərti hesab olunması üçün apellyasiya şikayəti versə də, Şirvan Apellyasiya Məhkəməsi şikayəti təmin etməyib.
