2023-cü il martın 13-də Astaranın Maşxan kəndində Yusif Verdiyev keçmiş həyat yoldaşı Gülşən Qəhrəmanovanı qısqanclıq zəminində qətlə yetirib. İttihama görə, o, qadının başqa şəxslərlə münasibətdə olduğunu düşünərək Gəncədən Astaraya gəlib, keçmiş qayınatasının evinə daxil olub və azyaşlı qızının gözü qarşısında qadına 15-dən çox bıçaq zərbəsi vuraraq xüsusi amansızlıqla öldürüb.
Məhkəmədə özünü qismən təqsirli bilən Yusif xəyanət iddiasını səsləndirib. Lənkəran Ağır Cinayətlər Məhkəməsi onu xüsusi amansızlıqla və təkrar adam öldürmə maddələri ilə təqsirli bilərək 18 il, əlavə hesablamalarla isə ümumilikdə 18 il 2 ay azadlıqdan məhrum edib. Yusif Verdiyevin cəzasını ciddi rejimli cəzaçəkmə müəssisəsində çəkməsi, cəzaçəkmə müddətinin başlanğıcının isə 13 mart 2023-cü il tarixdən hesablanması müəyyən edilib.
Sonradan Penitensiar Xidmət onun davranışını əsas gətirərək həbsxana rejiminə keçirilməsini istəyib. Qaradağ Rayon Məhkəməsi bu təqdimatı qismən təmin edərək 1 il 6 ay həbsxana rejimi təyin edib.
Apellyasiya instansiyası qərarı qüvvədə saxlayıb.
Ali Məhkəmədə baxılan son kassasiya şikayətində Verdiyev bu müddətin azaldılmasını istəsə də, məhkəmə şikayəti təmin etməyərək əvvəlki qərarları dəyişməz saxlayıb.
