Astara rayonunun kəndlərindən birində ər-arvad arasında yaranan mübahisə cinayət işi ilə nəticələnib.
1962-ci il təvəllüdlü Sabir həyat yoldaşı Mübarizə ilə birlikdə yaşadığı evdə ailə münaqişəsi zəminində mübahisə edib. Mübahisə zamanı o, plastik döşəmə fırçası ilə həyat yoldaşına zərbələr endirib. Nəticədə qadına müxtəlif dərəcəli bədən xəsarətləri yetirilib.
Hadisə ilə bağlı Sabirə Cinayət Məcəlləsinin 128-ci maddəsi – qəsdən sağlamlığa zərər vurma ittihamı irəli sürülüb.
Məhkəmədə təqsirləndirilən şəxs özünü günahkar bilib, əməlindən peşman olduğunu və zərərçəkmişlə barışdığını deyərək bunun nəzərə alınmasını istəyib.
Zərərçəkmiş qadın da məhkəməyə ərizə təqdim edərək həyat yoldaşı ilə barışdığını, ona qarşı heç bir şikayət və tələbinin olmadığını bildirib.
Nəticədə Astara Rayon Məhkəməsi barışığı nəzərə alaraq Sabir barəsində aparılan cinayət təqibinə xitam verib və onu cinayət məsuliyyətindən azad edib.
Adlar şərtidir
Mənbə: demokrat.az
