Astara rayonunda qonşusuna xəsarət yetirməkdə təqsirləndirilən 1990-cı il təvəllüdlü Ziya barədə məhkəmə hökmü çıxarılıb.
Hadisə bu ilin yanvarın 1-də rayonun kəndlərindən birində baş verib. Həmin gün saat 20 radələrində yaşadığı evin qarşısında qonşusu Nahidin Ziyaya "cibinə siqaret al qoy" deməsi səbəbindən onların mübahisə yaranıb. Daha sonra Ziya əli ilə Nahidin başından tutaraq darvazaya vurub və ona xəsarətlər yetirib.
Təqsirləndirilən şəxs məhkəmədə özünü günahkar bilib və hadisənin zarafatdan qaynaqlandığını bildirib.
Astara Rayon Məhkəməsinin hökmü ilə Ziya 6 ay müddətinə azadlığın məhdudlaşdırılması cəzasına məhkum edilib. Ona gecə saatlarında yaşayış yerini tərk etməmək, ərazi məhdudiyyəti və elektron nəzarət vasitəsi daşımaq kimi öhdəliklər qoyulub.
